Lelintihan mabuat pisan tur ageng pisan pikenohnyane ring kahuripan puniki. Boyaja sangkaning leluhur iraga mauwit saking anak sugih utawi kaloktah ring jagate, iraga megarang ngangkenin ngawinang byuta sareng sameton, nanghing sapasiraja kawentenan leluhur iraga patut ngangkenin kawentenanyane wyadin tiwas, kirang artha brana, yening sampun wyakti, iraga patut nyungkemin. Mogi-mogi tityang tan kakeneng alphaka guru. namostu.

Silsilah Keluarga I Dewa Putu Duwungan

Puniki sila-sila Pretisentana I Dewa Putu Duwungan ring Banjar Kapit Desa Nyalian, wantah saking sradhaa bhaktin tityang majeng ring leluhur. Mogi-mogi napi sane sinahayang titiang puniki wenten pikenoh ipun. Benjangan titiang jagi ngalimbakang sila-sila puniki saking Kawitan Leluhur Ksatriya Taman Bali, inggianyane saking Ida Bhatara Sang Anggatirtha duking sakeng Tirtha Harum nguni, sang sinengguh pretisentanan Ida Bhatara, kaloktah ring jagate mapungkusan " Maha Gotra Tirta Harum ". Titiang banget mapinunas menawi wenten warih Ida Bhatara sane honeng ring susastra, utamin ipun indik babad, iring limbakang malih utawi yening wenten harsa iring sareng-sareng karyanin lelintihan pasemetonan duwene, mogi-mogi benjang pungkur oka putu, nenten maparitaken malih.